//verifikasi //verifikasi Cerita Rakyat Desa Langkan, Banyuasin 3 - pendapat.id
Skip to content Skip to sidebar Skip to footer

Cerita Rakyat Desa Langkan, Banyuasin 3

Cerite Burong Kuwaw

            Arantu di dusun yang jeoh iduplah umak dengan anaknye. Name anaknye ni siti gelembong, urangnnye belagak, beek ati, penurut pule. Saying, umaknye ni la rande jedi die ni tak dibolehke keluar rumah oleh umaknye, jedilah siti gelembong ni tak katik kawan main.
            Tiap ari, siti gelembong ni gelek nyiapke segele keperluan umaknye bekal pegi ke kebon. Nah ari tu, siti gelembong ni kepengen nian nak makan tebu, laju die mengunke umaknye.
“Mak..hari ni kamu panen tebu yak?”
“Iye nak”
“Mak aku kepengen nian ko makan tebu, bewekke aku yak”
“iye kalu umak ingat”
            Pagi tu cak biasenye umak siti gelembong pegi ke kebon nak manen tebu-tebunye. Dak taunye bukennye begewe, umaknye ni bepujaan dengan nang cik. Segele hasel tebu yang begus-begus tu diberekkenye gele dengan nang cik, sedangke tebu yang busok dibeweknye belek. La nyampai dirumah, siti gelembong nanye dengan umaknye
“ Mak mane tebu yang aku nitip tu?”
“itu nah ambek be di keranjang”
“lah mak, ngape tebunye busok gele ni”
“oo.. salah petek berarti umak ni tadi”
            Sedehlah ati gelembong ni . sok paginye disiapkenye lagi segele yang nak dibewek umaknye, udem tu die ngomong lagi dengan umaknye ni
“Mak.. aku milu ye ke kebon ari ni”
“ dek usahlah..kau jege rumah be”
“ye sudeh men mek tu mak, tapi bewekke aku tebu yang begus ye mak”
“iye nak”
Tapi labetnye cak biase umaknye ni bepujaan dengan nangcik. La petang umaknye ni belek dengan mewek pesanan tebu anaknye.
“mak..mane tebu nye?”
“itu nah ambek dewek”
“yah mak ngape tebu busok lagi ni L” omongan gelembong ni tak dihirauke umaknye. Umaknye langsung be pegi ninggelke gelembong yang besedeh ati.
Laju betembang la siti gelembong ni
“tebu sebetang umak sayang
Anak sekok umak tak sayang”
            Sok pagi sok paginye lagi, siti gelembong ni mintak bewekke tebu terus dengan umaknye, tapi pas belek diselek tebu busok lagi tebu busok lagi. Apelah tak sedeh ati gelembong ni.
Siti gelombong laju betembang terus dengan mintak ditumbohke sayap
“Tebu sebetang umak sayang
Anak sekok Umak tak sayang
Anak sekok jedi burong
Burong kuwaw di pajer ari”
            Sekok malam siti gelembong ni mimpi betemu dengan bak nye, nah baknye ne ngomong dengan siti gelembong
“ nak kalu kau nek jedi burong, teruslah betembang jengan berenti renti sampai kau jedi burong”
Siti gelembong tebengun, pagi-pagi sepanjangan tu die ni betembang tak berenti berenti
“Tebu sebetang umak sayang
Anak sekok Umak tak sayang
Anak sekok jedi burong
Burong kuwaw di pajer ari”2x
Sudeh betembang tu tumbohlah sayap dikedue tangannye, betembanglah lagi gelembong ni sampai die jedi burong
“Tebu sebetang umak sayang
Anak sekok Umak tak sayang
Anak sekok jedi burong
Burong kuwaw di pajer ari”2x
La bekali kali betembang akhirnye siti gelembong ni berubeh jedi burong terus pegi ninggelke umaknye. Pas umaknye ni ngeliet anaknye la berubeh jedi burong, dikejernye lah siti gelembong tu
“nak turun nak turun, gek mak bewekke tebu begus xuntuk kau nak..turun nak” umaknnye nangis tak serentian karne nyesal lah ngecewake anaknye. Tapi siti gelembong tetap pegi ninggalke umaknye.
Betembanglah umaknye ni
“Tebu sebetang aku sayang
Anak sekok aku tak sayang
Anak sekok jedi burong
Burong kuwaw di pajer ari”2x

Gelembong akhienye jedi burong yang oleh urang urang disebut dengan burong kuwaw, karene tiap pajer burong ini ngeluarke bunyi “kuwau..kawau”

Post a Comment for "Cerita Rakyat Desa Langkan, Banyuasin 3"